العشرة الطيبة (1920)

تقديم فرقةنجيب الريحاني ثم فرقة سيد درويش وعمر وصفي

التأليف محمد تيمور وتأليف الأغاني بديع خيري

ألحان الأوبريت

 

 ملخص الأوبريت

  الشخصيات الرئيسية:

الوالي: فخر الدين ابو زعيزع  

 المملوك (الحاكم القوي) حاجي بابا حمص اخضر

وزير البلاط: حسن عرنوس أمين سر الوالي

حزنبل: الكيماوي أمين سر المملوك وياوره

سيف الدين راعي الغنم: فلاح محب لنزهة

نزهة: فلاحة محبة لسيف الدين

ست الدار: راعية الغنم تحب سيف الدين من جانب واحد

الباشكاتب: عم هاروت

فلاح يدير الطنبور – فلاحين – فلاحات-زوجة الوالي

وصيفات بقصر الوالي  - الزوجات السابقات لحاجي بابا حمص اخضر وعددهن أربع الرجال الذي شك الوالي في علاقتهم بزوجته وععدهم أربعة.

الفصل الأول "قرية"

على ضفاف النيل بقرية جنوب الجيزة، وعلى الضفة الأخرى قصر المملوك، فلاح على طنبور يرفع المياه من النيل ليروي الأرض ، يشجع نفسه بالغناء وتتداخل الشخصيات مابين بنات يملآن الزلعات وراعية الغنم ست الدار والصبي وإسقاط نقدي على انتشار الرشوة ثم فلاحين يعزقوا الأرض ثم غزل ثم ينتهي اللحن بتحفيز المصريين على أن يفوقوا.

ثم ديالوج غزل غنائي بين سيف الدين ونزهة (على قد الليل)، ثم تدخل ست الدار ساخطة على الرجال والنساء وخاصة سيف الدين الذي لا يبادلها الحب لانشغاله بنزهة.

يدعو حزنبل أمين سر المملوك حاجب بابا بنات القرية ليختار منهن بالقرعة زوجة جديدة للمملوك حيث أنه تخلص من زوجته، ويكتب أسماء البنات في وريقات توضع في "مشنة" لإجراء القرعة. ويجىء الوزير حسن عرنوس وزير الوالي ويتضح أنه صديق لحزنبل، ولهما ذكريات معا، ويأخذ كل واحد منهما ينتقد رب عمله، فينتقد عرنوس الوالي ونفهم أن الوالي كلما شك في شخص يتوهم أنه على علاقة بزوجته ويطلب من وزيره – عرنوس- أن يقتله ، إلا أن الوزير  لا ينفذ الأمر ويقوم بإخفاء هؤلاء الرجال. وبالمثل أيضا فإن المملوك حاجي بابا يهوى الزواج ثم يمل منهن ويطلب من حزنبل القيام بتسميمهن، ويقوم حزنبل بإخفاء هؤلاء النسوة مثلما يفعل عرنوس. وتدخل ست الدار القرعة وتكسبها، ثم يتساءل عرنوس عن صاحبة "المشنة" التي وضعب بها أسماء البنات، لأنه يبحث عن طفلة وضعت في مشنة تشبهها تماما والقيت في النيل، وكانت لبنت الوالي، ويتضح أن المشنة هي ملك لنزهة، ويقوم عرنوس بتعريف نزهة بحقيقتها وانتسابها للوالي ويجهز لها موكبا للذهاب إلى الوالي ويقوم سيف الدين بتوديعها. تقدم ست الدار للمملوك حاجي بابا لأنها زوجته الجديدة ويعطيها التعليمات والجميع يهنئون ويتمنون النصر بعودة سعد زغلول رمزيا في نهاية اللحن " سعد بلادنا هل هلاله   نصر من الله وفتح قريب".

 

الفصل الثاني "قصر الوالي"

وزير الوالي حسن عرنوس يلقن الحاشيةكيفية الوصول إلى المناصب الرفيعة وذلك عن طريق نفاق الوالي (علشان مانعلا ونعلا ونعلا لازم نطاطي نطاطي نطاطي)، حتى لو وصل الأمر إلى أن يصبحوا بلاليص* .

تتعرف نزهة على أسرتها إلا أنها ترفض أي عريس يتقدم لها حيث أنها تحب راعي الغنم سيف الدين، وترضخ عائلة الوالي وتجىء بسيف الدين ويصدر الوالي أوامره بزواج الأميرة جلبهار (نزهة) من سيف الدين.

يقوم المملوك حاجي بابا بتقديم عروسه الخامسة ست الدار إلى الوالي، وتسخر ست الدار من الوالي، ثم يسأل المملوك عن موعد زواج بنت الوالي فيخبره بأنه سيتم في نصف الليل، ويمني المملوك نفسه بأن الوقت كاف ليتخلص من زوجته ست الدار ليلحق قبل أن يتم زواج بنت الوالي من سيف الدين ليستأثر بها لنفسه حيث أنه هو القوة الغاشمة القادرة. وفي أثناء ذلك تلحظ ست الدار سيف الدين وتحدث مشادة بينها وبين الجميع عند محاولتها الحصول على سيف الدين. يتخلص حاجي بابا من ست الدار بعد أن يطلب من حزنبل الكيماوي أن يقوم بتسميم ست الدار ويوهمه حزنبل أنه تخلص منها وسممها، ويقدم حزنبل ست الدار إلى الأربعة زوجات السابقات للملوك حمص اخضر.

يلحق المملوك بموكب زفاف سيف الدين وبنت الوالي ويتهرب الوالي من الدفاع عن ابنته ويتركها للزواج لمن يفوز في المبارزة التي تدور بين المملوك وسيف الدين، ويدعي سيف الدين أنه أصيب في مقتل وينضم إلى بقية الرجال الذين طلب الوالي من وزيره عرنوس قتلهم.

 * وهو اول لحن يوزع هارمونيا كنترابوينت "غناء بوليفوني" في الموسيقى العربية. 

 

 الفصل الثالث "قصر الوالي"

بعد الاعتقاد أن سيف الدين قد قتل، ينتقل الموكب إلى حجرة ثانية لكتب كتاب حمص اخضر على بنت الوالي نزهة.

تدخل فرقة الغجر التي تكونت من خمسة رجال وخمس نساء للاحتفال بالزفاف ويواجهوا كل من الوالي والمملوك حمص اخضر بافعالهم وأوامر قتل الرجال والنساء دون ذنب أو جريرة.

وينتهي الأوبريت بزفاف الأربعة رجال على النساء الأربع وزواج سيف الدين من نزهة وزواج حاجي بابا من ست الدار.

 

ألحان الأوبريت

 على قد الليل مايطول

   واحده ويه
الأمر أمر الأغاباشي  

يقطع فلان على علان

آن ألاوان   والله طيب يازمان الخلطبيت
يحلالك يابلالك بيها   يايللي تصلي عالنبي تكسب
ديالوج هو بعينه   عشان مانعلا
طقطوقة يامرحبا بك يامرحبا بك   يحميك ياشابة لشبابك
إحنا الغجر وانتوا الحكام   اتمخطري ياعروسة واتهني
الليلة يامكتر عرسانها
 

واحده ويه

صوت القاهرة  
 

   واحده . اوه -  المؤدي نظمي مزراحي وزكي مراد

 المقام عجم

 

 
           فلاح:                    واحد وّه
              بنت:                  قدمي ورا مني

           فلاح:                    اثنين وّه

             بنات:                  هيلا ليصا هيلا ليصا

           فلاح:                    تلاتة اوّه

           بنت:                     عوافي يابو حفني

           فلاح:                   يعافيك يا خالتي نفيسة

          الغنم               ماء  ماء  ماء

ست الدار:          وله يابخاتي    فتح عينك على غنماتي

الصبي:             ماهما مفتوحين

فلاح:               أربعة اوّه

ست الدار:          شوف كام نعجة

الصبي:             ديهدي راحوا فين الباقيين

ست الدار:        طول ماهو ورا خالتك الحاجة ماميش اغا                                       وجعتها طين  

 هات ياعزايم    هات يا كرايم

الجميع:            اتابي بهايم عبد الدايم راحو رشوة روخرين

فلاح:               خمسة اوّه

بنت:                هيء هيء هيء

فلاح:               ياخرابي

بنت:                يوه حاتزحلق

فلاح:               ياه   ياه   ياه

                  أنا سقت عليكم سيدي لمبابي بلاش الأي والأيه والآه

فلاحين (يدخلون حاملين الفؤؤس)

 مبقاش فاضل  نعزق واصل  غير جيراطين من جبلي الفاصل

 حدا وابور الطحين

فلاح:               الحمد لله وخلصنا

البنات:             أجعد بالعافية                ماشيين

فلاح:    وانت مع السلامة ياحسنة   يالله ياحتة م المصارين

ست الدار: فوت بنا غادي م اليمة دي      يو  يو!    يافيدو

كلب               هو هو هو هو هو هو (نباح كلب)

ست الدار:          حود ع اليمين

المزارعين:  انضر يابوي النجف الأصلي النبي

                   احسن عالنساوين

 دي الفلاحة من دولا بمية   من الكخيات المتنفخين

            قال يتغالبوا وعم يعايبوا علشان مش متقمطين

              ولا هماش عارفين

           هو تلفنا وخلانا شفنا غلب الغلب غير التمدين

            فوقوا يامصريين   فوقوا يا مصريين 

            فوقوا يامصريين   فوقوا يا مصريين

 

على قد الليل مايطول

صوت سيد درويش  
 

 على قد الليل مايطول(بين سيف الدن)

أداء سيد درويش وحياة صبري

   تأليف بديع خيري  مقام   بوسلك

 

 

سيف الدين    على قد الليل مايطول    مسترضي بسهرى ونوحي

                    في حبك ياللي من اول  مشوفك تترد روحي

                     سنين وأيام هايم فيكي   بزمارتي اصحيكي

                طول ماأنا وانت في الدنيا دي   افوت اهلي واجدادي

                            حروح على فين وانتي قصادي

   نزهة   (من النافذة)   أه ياترى ياربي ده هو واللا لأ... حبوبي؟

   سيف الدين             ياعين الحبوب من جوه

                     ياسبب وعدي ومكتوبي ياكتاكيتها

    نزهة                      ياننوسه

   سيف الدين               ياقطاقيطها

   نزهة                        ياحنتوسه

  سيف الدين           ده انا م النجمة في استنظارك

   نزهة                      آديني نازلة

 سيف الدين          اما نهارك ابيض من طبق القشدة

  نزهة                  اوعى يكون حد شايف طيفي

 سيف الدين          حطي في بطنك بطيخة صيفي..

                         شفتي بتاكلني انا في عرضك

                          خليها تسلم على خدك

  نزهة         يوه  يا دين النبي تنك سايح ماشبعتش من ليلة امبارح

  سيف الدين      ماتفكرنيش اما دي حقة كانت ليلة في غاية الرقة

   نزهة           فاكر وانا حاطة ايديه في بطاطك قبلي الترعة

                    على غفلة ملت عليه ماقدرتش اقولك اوعى

 سيف الدين        قمت انا بصيت يمين وشمال

                          ساعة مالقيت مفيش عزال

                     طبل طبلي كده كده كده كده

                  وزمر زمري   كده كده كده كده   وشقلي بقلي

                    وعنها ودغري خدت لي بوسة لكن صنعة

  نزهة           من يومها عرفت في الآخر      انك مستعبط ساهي

                ايش قولت المثل الساير      ياما تحت الساهي دواهي

 سيف الدين  أه عليها عيون ماتلتقهاش على منادمين باكده يابلاش

  نزهة           عليه مناخير فشر النبقة

  سيف الدين  اما قوامها زيه ماتلقى  دانا متبرجل ياحدقة ياكتاكيتها

                          ياننوسها ياقطاقيطها ياحنتوسها

                           اديني بوسة  وكمان بوسة

                       شفتي بتاكلني انا في عرضك

                             خليها تسلم على خدك

 نزهة    ياه يادين النبي تنك سايح        ماشبعتش من ليلة امبارح

سيف الدين     متفكرنيش اما دي حقه كانت ليلة في غاية الرقة

 

يقطع فلان على علان

صوت القاهرة  
 

يقطع فلان على علان، المؤدي حياة صبري  المقام عجم

 

 

 
يقطع فلان على علان           دي الناس بقت زي الثيران

رجاله الشوم نسوان اللوم       ستين خناقة يااخواتي في اليوم

لو كنت مللي بالك فيهم         اللي عصاية تجريهم

ماكانوش يموتوا في جلدهم       ويحاسبوا مني كلهم

إن كان صغار والا كبار        يشوفوني يجروا بالمشوار

حتة لسان فشر التعبان              في الردح قوة الف حصان

ضرب وتلطيش غيره ماعنديش  اللي له بخت ما يعرفنيش

ماحد  يااخواتي غلبني           على الشناكل لعبني

 غير مضروب الدم دا هو         اللي ملقح هنا هوه

دايبه في هواه قال مش عجباه

 وحياة دهوه لانا مورياه (تمسك مقصوصة من شعرها)

 

الأمر أمر الأغاباشي

صوت القاهرة  
 

 المؤدي نظلي مزراحي، ومحمود رضا، و عبد الوارث عسر

 المقام حجاز

 

 
   بنات: الأمر أمر الأغاباش      اللي يقوله علينا ماشي

           قد احنا جينا ولاسبناشي    نتاية مليحة ماجيبنهاشي

  حزنبل: يازعيط يامعيط     يابو كبير      يام شحيبر يام بكير

          فيكو من كتم السر

 الجميع: في بير
  حزنبل:   خير في سلامة
 الجميع:  وسلامة في خير

  حزنبل:  بقاسعادتلو فخامتلو مملوكتلو فشخرتلو

           أبصر مدرك ايه هاتلو وهكذا إلى آخر هاتلو
 الجميع:  الله يديم عزه ويتأيد  ويوعده بزيارة السيد

          ونفرح له بألف وليد  م الخلفة ونرقص ونعيد

 حزنبل:سيدكو وتاج راسكو الأزعر  نسل حلمبوحه الأكبر

          سنجق مماليك البندر    حاجي بابا     البنات: حمص أخضر

          دينه وعقله وإيمانه    انه يغرق لودانه

          ليل ونهار مع نسوانه  فشر النمرود في زمانه
 الفلاحين:  راح يبقى احسن من دا توصل  دي الناس مقامات ياأغا حزنبل
 البنات:   ان كان يمدغنا نستحمل  مانقولوش بم   قول اتفضل
 حزنبل:   فبناء على الحلبفة          عايز قطقوطة خفة

          حنقيها م الطايفة            ويجيلكو ياخدها بزفة

          كل نتاية بنت بنوت تدي اسمها بالمضبوط

   للباشكاتب عم هاروت توت حاوي توت  توت حاوي توت توت حاوي توت

          يالله ياوظاويظ ملو له على الأسامي
 الكاتب:  انتي مين    بنت:  عيشة   بنت تانية: فاطمة   بنت تالتة:  خضرة
 الكاتب: دهديه هو ليه عشر ايدين               بنت: وحياة امك
الكاتب: طب تعالي           زهرة: زهرة بنت الشيخ حسين
 الكاتب: زهرة زهرورة زهرهر واسم والدها حسين    ساكنة فين
 زهرة : في الجسرية
 الكاتب:أه ياريتنا موعودين لو يسيبها حاجي بابا

                 كنت أكون من المسعودين

 ست الدار:إلا يعني فيها ايه  يابنت قايسي (مونولوج مع نفسها)

             مافيهاش حاجة    اهي مطرح ما ترسي

            اكتب اسمي والا لأ     لازم اكتب

            المقايسة خير وبركة      يامكتب
  الكاتب:  هيه

  ست الدار: شك اسمي ويا دولا

  الكاتب: خرجوها   الجميع: مابقاش الا دي روخره يكتبوها

  ست الدار:بتقول ايه

  الكاتب :    بقولك امشي

  ست الدار:      وانت مالك جاك مشش  ينتش قفص عمك والا خالك

 بدي اعرف ايه وحش في  آديني  وآدي راسي وآدي خشمي   وآدي عيني

       واللا يعني ماليش جماعة بيعشقوني  ده بدال الواحد ميتين عم يلاغوني

   هو كان على راسكوا ريشة اما بلوي واللا آدم مش نافضني من امي حوا

    مادام الرك ع اللي تكون حليوه   قبل منكو وغصب عنكم ايوه ايوه ايوه
 

والله طيب يازمان الخلطبيط

صوت القاهرة  
 

 المؤدي نظلي مزراحي، ومحمود رضا، وعبد الوارث عسر

 المقام حجاز

 

 

 الجميع :       والله طيب يازمان الخلطبيط 

                     الأصايل يبقوا في آخر الزمر طيط

                  واللي كانت هردبيسة وبزرميط  

                  طالعة في العالي واحنا في الغويط

 حزنبل:         دا بختك بابو بخيت الراعية بقالها صيت

 ست الدار:     اللى مسعده روسبيت        ماتهموش العفاريت

 الجميع:        اللى مسعده روسبيت        ماتهموش العفاريت

 عرنوس:       كله كوم إلا المشنة ديه كوم مسألة عايزه نظر

                  فوق اللزوم

                   اسمعوا ياهوه

 الجميع:           ادحنا سمعانين

 عرنوس:      المشنة دي صاحبها الأصلي مين

 الجميع:        المشنة دي                  عرنوس: صاحبها مين يقول

 الجميع:           دي بتاعة البنت نزهة       عرنوس: مين في دول

 الجميع:           أهي عشتها حداك           عرنوس: العشة دي

 الجميع:         هي ايوه ايش عجب يادلعدي

عرنوس:        كلكم دلوقتي سكتر

 الجميع:           كلنا

 عرنوس:        ايوه كلكم ماتستنوش هنا

 الجميع:           كلنا دا ايه         عرنوس: غجر ماتسمعوش كلمتي

 الجميع:           نسمعها            عرنوس: يالله ماتختشوش

 الجميع:           اما حتة فصل قال بيقول لنا كلنا كلنا

 عرنوس:            ايوه يالله كلكم

 الجميع:           كلنا                عرنوس: كلكم

 الجميع:           يالله بينا كلنا       عرنوس: كلكم

 الجميع:           يالله بينا كلنا

 

أن ألاوان

بصوت سيد درويش الاسطوانة  
 

 آن الآوان ياحلوة آن، المؤدي سيد درويش وحياة صبري

تأليف بديع خيري المقام عجم

 

 

لجميع : آن الآوان ياحلوة آن   والسعد كان مستني يومك من زمان

  سيف : اتمخطري واتغندري             واتجعصي في التختروان

الجميع : آن الآوان ياحلوة آن  والسعد كان مستني يومك من زمان

            يانور العيون خايف يكون      حاتسيبيني يازينة البنات

  نزهة  :          بكرة تشوف جنيهات الوف وازروطك

                        بالنشنات            (وادندشك)

  سيف:  مهما اسوح والا انوح       دانا اروح وراك كوردفان

           اتمخطري واتغندري          واتجعصي في التختروان

الجميع: آن الآوان ياحلوة آن    والسعد كان مستني يومك من زمان

 

يايللي تصلي عالنبي تكسب

صوت القاهرة  
 

  المؤدي حسين رياض والمجموعة، المقام نهاوند

 

 

 الجميع:  ياللي تصلي عالنبي تكسب  

              ده حاج بابا في وسط الموكب

              فشر قمر ليلة اربعتاشر

 حاجي:   ناسس نساء ناسس رجال   تشكرات على احتفال

               زراعات مدارس           حرام حلال

               مفيش لزوم كلم كثير     دوشات هموم عسكر خفير

               اهميات يوك مش أمان أمان أمان أمان

 الجميع:  حاجي بابا شوك باشا        حاجي بابا شوك باشا

 

يحلالك يابلالك بيها

صوت القاهرة  
 

   المؤدي حسين رياض وعبد الوارث عسر والمجموعة

 المقام عجم

 

 

 الجميع:  ياحلالك يابلالك بيها         ياحلالها يابلالها بيك

            فرحة وكانت عينك          فيها شوبش ياسيد المماليك

حاجي:   اماسن قيمقلي عفارم       حتة نتفة شقلبظات

                       جال يوردا هيدي بير هانم

الجميع   بيقولك سلامات سلامات

حاجي:علم الله افندم فيه حرارات درجة مية غرام ايلري

 صحة وارسن

         قوة وارسن لحم شحم حاجة طاظا

  ست الدار:

   بكرة البس قفاطين شاهي  ويروق لي حال الدنيا

               واخلي المضروب يتفلفل     زي مافلفلني ابن الايه

حاجي:   جانم حوشلارم شروطات     كلم اسمع تنبيهات

الجوقة:  جانم حوشلارم شروطات     كلم اسمع تنبيهات

حاجي:   طالع نازل خارج داخل      لازم قدم احترامات

الجوقة:  طالع نازل خارج داخل      لازم قدم احترامات

البنات:   طاوعيه حتى إن قال لك ارمي نفسك في البحر

  أهو وافقيه

حزنبل:   واقعدي له على قرافيصك ركبة ونص

   وبوسي رجليه

الجميع:  بوسي رجليه

حاجي:   كن معلوم في كل اهالي 

    عسكر ظباط حاشية بلاط

          زنبليطات افراح وليالي      حظ ملاح فنتزيات تكرر

الجوقة:  زنبليطات افراح وليالي      حظ ملاح فنتزيات تكرر

          فنتزيات فنتزيات             فنتزيات فنتزيات   تكرر

          حاجي بابا شوك ياشا       حاجي بابا شوك ياشا

الجميع:  ديهده العز وديهده الأمله  عقبال مانشوف كل حبيب

          سعد بلادنا هل هلاله        نصر من الله وفتح قريب

                   ختام الفصل الأول

 

عشان مانعلا

صوت الكورال  
 

 المؤدي محمود رضا والمجموعة، المقام عجم

 

 

 عرنوس: عشان ما نعلا ونعلا ونعلا  لازم نطاطي نطاطي نطاطي

الجميع:  عشان ما نعلا ونعلا ونعلا  لازم نطاطي نطاطي نطاطي

      بسلامته الوالي ابو زعيزع           مهجص باشا دقن تعيتع

      افيونته تمللي قال ايه                   تترصص دايما حواليه

                      نروح واقفين زنهار         زي القط والفار

                      تلقاه دايما منفوخ نفشرله   طاخ طيخ طوخ

عرنوس: الرك على حبة بلوتيكه      وذمة كاوتشوك خربانة

في نفس الوقت 

 مادام الامير ملته انتيكه     لازم الرعية تكون وحلانه

كونترا بوينت    صوت 1

الجميع: الرك على حبة بلوتيكه     وذمة كاوتشوك خربانة

                 مادام الامير ملته انتيكه     لازم الرعية تكون وحلانه

        غناء بوليفوني    صوت 2   هارموني

     عرنوس: حذر فذر ياواد انت بعقلك 

                  بعد الحنشصة دي اللى انت عليها

                 ياهل ترى الدنيا دي حاتبروقلك  

                  وتشوف ماشاف قراقوش فيها

الجميع:  تعرفش المسألة ايه         عرنوس متعفرت ليه

عرنوس: بالحق  سلامات سلامات        ايش حال الافاوات

الجميع:        محاسيبك

عرنوس: ياخي سيبك

الجميع:  اول شرط نطاطي البصلة    لسيدنا الوالي ونستعبط له

عرنوس: مهما تسمعوا تهجيص      اعملوا روحكم بلاليص

الجميع:  مهما نسمع تهجيص        نعمل روحنا بلاليص   

       بلاليص بلاليص            بلاليص            بلاليص

             عشان ما نعلا ونعلا ونعلا  لازم نطاطي نطاطي نطاطي

 

ديالوج هو بعينه

صوت القاهرة  
 

  المؤدي سيد درويش وحياة صبري والمجموعة، المقام حجاز

 

 

 

 نزهة      هو بعينه وبمناخيره             هو بوشه وبشفاتيره

                            هو اللي انا بالي فيه م الأول

                ملحقتش ابص في وجناته       وسمنت النص بغمزاته

  سيف           صواميل رجليه سايبه مني

  نزهة           وانا عصافير قلبي بتغني

  سيف         سبحانه ما أحلى تعديله          مافيش كده لما يعدلها

  الجميع      اتلم سيف الدين على اللي له

                     واتلمت نزهة على اللي لها

   سيف           والله زمان يامهلبية

  نزهة            من قلبي لقلبك دورية

  سيف           وحشتني عيونها العسلية

  نزهة           وحشتني رموشه البصلية

  الوالي          الأمر خلاص أصدر منا         الليلة يكون ليلة حنة

  الجميع          اهو دا لماجور وادي الشلية     قرموط اتجوز بلطية

                       الليلة الحنة ياعنية              وبكرة تكون الصباحية

 

يحميك ياشابة لشبابك

صوت القاهرة  
 

 المؤدي سيد درويش وحياة صبري وتظلي مزراحي و عمر وصفي ومحمود رضا وحسين رياض، المقام عجم

 

 

    الجميع:  يحميك ياشابة لشبابك       ويبيض ياشايب شيبتك

              تتهنى به ويتهنى بك        هيص ياجندي بدلوعتك

 عرنوس: دستور ياللي في وشه اخلوله

                حمص وعروسته باركوله

  الجميع:  حمص وعروسته باركوله

   الوالي:   هجاص خباص حاجي سنجق

                 خمسة مره جوز طلق

  الجميع:  اللي قالوا زمان حايعيده 

               ويدش قديمه في جديدهيمه في جديده  

  الوالي:          بيرم كلمني كلام لايق

  عرنوس:        هس سمع روقوا ياخلايق

  حاجي:         محسور منسوب حضرة والي 

                     فخر الدين باشا جناب عالي

  الوالي:   مرحبا مرحبا تشريف بولضم كعكم كعكم كعكم كعكم

 الجميع:      بلضم بلضم بلضم بلضم

 حاجي:       شفت افندم عروسة برنجي

 الوالي:       شفته

 حاجي:       ها  مش شفته افندم اتكنجي

 الوالي:       شفته

 حاجي:       ها مش شفته افندم اوتشنجي

 الوالي:        شفته (متضايق)

 حاجي:        ها مش شفته افند دورتنجي

 الوالي:         شفته (مغتاظ)

 حاجي:        ها دلوقتي قدم بيشنجي

 الوالي:         جوزاك

 حاجي:         ها

 ست الدار:  بقى ده الوالي يوه يانداشه 

                  الخلقة دي هه خلقة باشا

 الجميع:   يافضيحتك مين كان يتصور 

                حمصة عا الوالي بتتمسخر

 الوالي:    انشاء الله جوازات صافيات  

                دوب سوا سوا عرق العافيات

 حاجي:    استفهام مخصوص من فضلك 

                امتى رايح جوز بنتك

 الوالي:   طبلجي زمرجي هيص جهاز 

               نصف الليل يحصل فيه جواز

 حاجي:    بقى يحصل فيه في نصف الليل

 الوالي:    ايفت افندم

 حاجي :    نص الليل؟

 الوالي:     ايفت افندم نص الليل

 حاجي:  حمدا لله شكرا لله وقت كافي

               علشان إرجع جوز بنت الوالي

               (على حدة)

 الوالي:   بوتشريفات كله خلاص               سكتر بره أيااكل الناس

           تعظيمات واجب تقديم                 حالا بوسوايد كريم

 عرنوس: تاتاليف توتا واو   تيتاييه يالله امال ما تبوسوا ايديه

 الجميع:  يابو الريش انشالله تعيش    وتدوب رجليك في البراطيش

 سيف:   الحب يحلا في نص الليل    امته يقرب نص الليل

         يانزهة الارواح                       يابهجة الأفراح

         السعد لاح ماحلا الصباح    بعد الفرح بعد الفرح

                     في نص الليل

 عرنوس:          حضرة حمص اخضر اغا

 حاجي:            عروسات نمرة ستة  صفا

 ست الدار:         هوه ديه سيف وللا عفريته

 سيف:             ست الدار

 ست الدار:         آديني عرفته

 الوالي:            بعدين هانم بفضل والي      ايده يستنى كده عالي

 حاجي:            قدم هانم  بوس يد كريم

 الجميع:           قدم هانم بوس يد كريم

 ست الدار:    إن كان على البوس دنا ابوس وابوس وابوس وابوس

 حاجي:            كافر ديوس

 الوالي:            سكتر بره

 الجميع:           سكتر بره قدام والي فيه حد يبوس

 ست الدار:  جرى ايه في عنيكم بقى خفة

                   زى ده ماقطمهوش م الشفة

 سيف:   اخص ياويلي ياسواد ليلي  ايه بس مشعلأ دي في ديلي

 ست الدار:  والله باينها رايحة تبزرم على راسكم واخليه لكم ميتم

 الجميع:   أيادم ياسم ياكبة تشيلك   قصبة في وشك حمة تجيلك

 نزهة :     ياخواتي ماتشهدوا ويايه     عصفوري حاتخطفوا حداية

 ست الدار: راسي والفين صرمة قديمة

                 ماخرجش واسيب دى سليمة

 الوالي:      كوكمش مجنون سكتر بره

 الجميع:      كوكمش مجنون سكتر بره

 سيف:    حمله وانزاحت ياسيد                 جمله وانزاحت يا سيد

  الجميع:      حمله وانشالت يابدوي

 

طقطوقة يامرحبا بك يامرحبا بك

صوت القاهرة  
 

  المؤدي حياة صبري تأليف بديع خيري

 المقام شهيناز كردي

 

 

لجميع (ستات):      يامرحبا بك يامرحبا بك

                           آدي اللى نابنا وآدى اللى نابك

ست الدار:       ماضاقت الا وفرجها سيدك      يارب نجينا م المهالك

الجميع (ستات):    يامرحبا بك يامرحبا بك

                          آدي اللى نابناة وآدى اللى نابك

ست الدار:    ايش بار علينا ياما خدعنا       ايش بار علينا ياما خدعنا

                         لولا حزنبل لكنا ضعنا 

                    يامرحبا بك يامرحبا بك آدي اللى نابنا وآدى اللى نابك

الجميع (ستات): ايدنا في ايدك طبل وزمر

                       لازم نكيدك ياحمص اخضر

ست الدار:  دى العبودية ماخلص زمانها وآدى الحرية حايؤؤن أوانها

الجميع:     يامرحبا بك يامرحبا بك آدي اللى نابنة وآدى اللى نابك 

 

اتمخطري ياعروسة واتهني

صوت القاهرة  
 

 المؤدي سيد درويش، وحياة صبري وعمر وصفي، وحسين رياض والمجموعة، المقام حجاز كردي

 

 

 الجميع:    اتمخطري ياعروسة واتهني      بعريسك سيد العرسان

                   ده بلبل الآفراح بيغني        والسعد جانا اشكال والوان

 سيف:      ياسمن بلدي يابلح أمهات        يافل مجوز في البستان

                ياللي عليكي تروح جنيهات     بعد البعاد الوصل اهو آن

 الجميع:     اتمخطري ياعروسة واتهني   بعريسك سيد العرسان

                  ده بلبل الآفراح بيغني        والسعد جانا اشكال والوان

 نزهة:      الرب عالم يوم مارأيتك       اني على الهجران ما أدرش

                افرح وظيط واتهنى بعيدك     دى ليلة الحظ ماتتعوضش

 الجميع:      اتمخطري ياعروسة واتهني   بعريسك سيد العرسان

                     ده بلبل الآفراح بيغني  والسعد جانا اشكال والوان

 حجاب:        حاج بابا شوك يشا                 حاج بابا شوك ياشا

 حاجي:                    دورزنهار

 الوالي:                   اسباب توقيف حالا وأمور لازم اسكت

 حاجي:                    دورزنهار

 سيف:        ياحاج بابا حرام وحياة راسك وراس امك وابوك

         انسى القديم واللى فات مات       دا يوم فرحنا دا يوم مبروك

 حاجي:    ايقاف اعمال تغيير احوال    خيبات آمال وغدر زمان

                  نرده أفكار اسمع أخبار        ست الدار جنات مكان

 الجميع:    هىء هىء هىء هىء ياخسارتك ياست الدار

                 بعد العز اهو حظك طار

 حاجي:      واليوم لازم جوز غيره جوز ابنة فخر الدين

الوالي:   لكن افندم يومش لازم هاذي زوجه سيف الدين

 الجميع‘:   هذي زوجة سيف الدين  هذي زوجة سيف الدين

 حاجي:    هايدي سكتر مكتر هلضم بلضم كرتابزونك

 الجميع:   ها ها سنجق منجق سيفه محزق وبيضرب لنج

 الوالي: اللى منكم اغلب تاني مش ملزوم سيبوا والي في حاله

             مافيش كاني مافيش   ماني امسك بنتي حلاله بلاله

 سيف:   اهو اللي راح يغلب راح ياخد ست البنات يتنعم بها

              تهشكه لما يكون رايق تسقيه م الجنة ويسقيها

 الجميع: اهو اللي راح يغلب راح ياخد ست البنات يتنعم بها

             تهشكه لما يكون رايق تسقيه م الجنة ويسقيها

 حاجي: بظظ عينك ها ها ها  كسرايديك ها ها ها

              لخبط لخبط ثم كمان

 سيف:    وحياة عمك وشرف امك لازم اخليك زفتنيان

ا لجميع:  اهو اللي راح يغلب راح ياخد ست البنات يتنعم بها

               تهشكه لما يكون رايق تسقيه م الجنة ويسقيها

 حاجي: هنكر منكرها ها ها اول آخر ها ها ها

              كركبه مركبه مرفوعات

 سيف:   خد فوق راسك ها ها ها ودي في جنابك ها ها ها

 حاجي:   طعنة خنجر ثم وفاة  

 سيف:            آي

 الجميع:     حاج بابا شوك يشا  حاج بابا شوك ياشا

 اهه سيف الدين راحت ايايه        والله خسارة يا سيف الدين

 نزهة:  حظي انقضى وآدى القضا وآدي المقدر يامسلمين

الجميع:  يالله بنا عالاودة التانية نكتب كتابك يا حمص اخضر

    اتمخطري ياعروسة واتهني                  بعريسك سيد العرسان

   ده بلبل الآفراح بيغني             والسعد جانا اشكال والوان

 

احنا الغجر وانتوا الحكام

صوت القاهرة  
 

 المؤدي سيد درويش ونظلي مزراحي، وعمر وصفي والمجموعة، المقام صبا بوسليك

 

 

  الجميع: احنا الغجر وانتوا الحكام افعالنا ج و س ك لا م الشر راح

            والحظ اهو جاء

          هاتوا الكؤؤس  عيدوا الايام عشان ما نرقص ونغني

 الوالي:  بان والله افكار يوك يافندم عاوز اسمع غنيوه منكم غنيوه

          ترى تم ترى تم ترى تم ترى تم

 الجميع: ترى تم  تم  تم تم تا

 ست الدار:اسمع كده وخليك فاكر إن الزمان مش حايدوم لك

          الدهر من طبعه غادر يكفي يابني آدم ظلمك

 الوالي:  بان والله افكار يوك يافندم عاوز اسمع غنيوه منكم غنيوه

          ترى تم ترى تم ترى تم ترى تم

 الجميع: ترى تم  تم  تم تم تا

 سيف:  يكفى الغرور نضف قلبك              حظك وعزك شىء زايل

       ده اللي يشوف اوقات مجدك          بكرة يشوف دمعك سايل

 الجميع: احنا الغجر وانتوا الحكام افعالنا ج ر س ك لا  الشر راح

          والحظ اهو جاء

       هاتوا الكؤؤس  عيدوا الايام عشان ما نرقص ونغني

 

الليلة يامكتر عرسانها

صوت القاهرة  
 

 المؤدي سيد درويش، وحياة صبري ونظلي مزراحي، ومحمود رضا، وحسين رياض، وعمر وصفي، وعبد الوارث عسر، والمجموعة

 المقام عجم

 

 

 الجميع:  الليلة يامكتر عرسانها  حدش له هوى في جوازة كمان

          ده الحب يحلى في نص الليل   ظيطوا وغنوا ياعرسان

 عرنوس: الكتكوتة الالاتركه

 حزنبل:   للشمروخ الخفافي

 سيف:   دانا اموت فيكي ياسمبوسكة

 نزهة:   كل ده عنى ماهوش خافي

 الجميع:  حطي بطاطك في بطاطه           واتركنوا عا الناحية دي

 عرنوس: دلوقتي الدور على سي ميلص

 حزنبل:   وآدى عروسته الخلبوصة

 عرنوس: يبقاش احسن من دي عروسة

               ولا فيش احسن من دا عريس

 الجميع:  حطي بطاطك في بطاطه     واتركنوا على النحيا دي

 حزنبل:   وآدى اربعة

 عرنوس: هاتهم بالمرة للكام لطخ اللى فاضلين

 الجميع:  حطوا بطاطكم في بطاطهم واتركنوا ع النحيا دي

 حزنبل:   اهي دي اللى فاضله من البيعة

 عرنوس لحاجي: واهو ده منابك ياسي جعلص

 ست الدار: اخصيه وميت اخصيه 

                 انا مالي طلعت م المولد بلا حمص

 حاجي حمص:

     انا ابوس راسك ابوس رجلك معلهش النوبة تعالى لي

 الجميع:   لليلة يامكتر عرسانها      يارب بارك للعرسان